Phili 3 | DOB | STEP | Gosegwao, 'ilobwenemi wate be 'ida 'Inapwana manuna wada gwausowala. Lowa 'ami loina ya'etoladinawa, ta gete watei nuwanuwagu be yada 'etoladi limanawa, be 'enega wada miya bobo'ana.

Philippians 3

Bubuna bobo'ana manuna

1 Gosegwao, 'ilobwenemi wate be 'ida 'Inapwana manuna wada gwausowala. Lowa 'ami loina ya'etoladinawa, ta gete watei nuwanuwagu be yada 'etoladi limanawa, be 'enega wada miya bobo'ana. 2 Wa'ita'i'isimi toto'umalidi 'idi bubuna 'atuwa kedewa, taudi tolodaba 'adi bodao 'ediyega, 3 'Abo Yaubada 'ena tabwagobwago yaluyaluwana 'enega, ga Yesu Keliso namo tatupuna, ta nigeya bubuna bale'u 'ena taemiemisa, gote 'enega tamwalatoni 'aene ni'atu lodaba 'ai'aila ta'ewena. 4 Ona'ai'aila, sawesaweguya be esaesa bale'u manuna yada onatu'e, manuna 'abo'agu 'agu esana tomota yaudi 'adi esanao 'iloetana sinedi, 5 manuna 'abo'agu goma Isileli 'ai'aila, 'igu susu Beniamina, ga silodabegu 'asiyata eita 'igu tubuwa mulinaya, ta Palisiyao 'idi loinao yamuliya 'ai'ailidi, 6 ga yaetapewa sinabwana toekalesiyao 'adi gie'elouya 'enaya, ta nigeya 'ebweu wate Mosese 'ina loina yale'oale'oa. 7 Ta esi 'agu esana nina sinabwana ya'awa yage besobesoena, manuna Keliso namo 'ena yatagwalegu. 8 Ona'ai'aila, 'igu 'Inapwana Yesu Keliso 'ana mwalatoi bobo'ana wawasae, ga esaesa bale'u 'ibobo'ana sinedi, 'enega esaesao nidi ya'awa yage besobesoedi, ga Keliso nina manuna yage maibo'adi yaloseyedi ga ya'awa to'umaliyedi, manuna nuwanuwagu Keliso namo, 9 ta wate nuwanuwagu Keliso ma'iyagu 'ada miyami, nigeya 'aene taugu 'igu bubuna palupalunega, nai Mosese 'ina loinao 'ediyega, ta esi emisa Keliso 'enaya 'enega, nate 'ida bubuna palupaluna Yaubada 'i'ebwa'eda 'ida emisa Keliso 'enaya manuna. 10 Nuwanuwagu wate Keliso yada mwalatoni be 'ina toololimana 'ana waiwai yada lotoo, be 'ina 'elouya wate tauna nadigega yada lotoodi, nai 'ina mwawasa yada etotowane, 11 be 'enega, 'eguma kapekapeyana, mwawasega 'abo'agu wate yada toololimana.

12 Nigeya 'aene ni'atu toololimana yalobena, nai 'igu bubuna ni'atu maibo'ana sibobo'ana, ta esi gete 'igu 'ebe masi be 'aene yada giyai, manuna yage gete manuna Yesu Keliso ni'atu 'igiyaigu. 13 Gosegwao, nigeya yaonaona 'aene ni'atu yagiyaina, ta esi 'igu nuwanuwa 'ebweuna namo, 'enega yage muliguya yanuwa pupuledi be to'ase mataguya manudi yatootoo waiwai, 14 nate 'ebe masi nina, nai Yaubada 'ina pali galewaya, Yesu Keliso 'enega. 15 'Enega maibo'ada gete nadigega tada nuwanuwa leleleya, 'abo 'ida nuwanuwa ni'atu simatuwa. Be wate 'eguma to'ase manuna 'imi nuwanuwa dumadumana, yage nina 'alena Yaubada wate ma'etamo 'ida e'ita 'emiya. 16 Ta sa'i 'ilobweneda be yage nidi talobediya tagiyai 'i'isidi.

17 Gosegwao maibo'ami waetotowanegu, be yaisigedi taudi 'idi bubuna nadigega 'abo'agu waduneduneyema, be 'omi wate wada bubuna nadigega. 18 Ta sa'i tomota yaudi 'idi bubuna 'enega Keliso sietalauwalena, tauna manuda 'imwawasa kelose 'enaya. Talauwalao nidi lowa yasimanedi 'emiya, gete tuga wate ma igu dedoi yalolima, to'umalina nidi 'emiya yasimanedi. 19 Taudi 'idi 'ebe losalowa sida esilae, manuna 'idi 'ebe emisa gamwapawa manuna, be yage 'ebe omayamayao situputupudi, manuna yage bale'u namo nuwanuwadi. 20 Ta 'abo'ada esi 'ida sena galewaya, be gote 'enega 'ada To'etoseyana, tauna 'ida 'Inapwana Yesu Keliso, ma'etamo 'iilama, ta tauna manuna tayamwayamwa. 21 Be tuta nina 'iilama ooda 'ida sa'ugelasedi; batuwa nenetadi, ta 'ida sa'ugelasedi 'atuwa tauna oona waiwaina ta 'esasena nadigega, ta 'ina guinuwa gete tauna 'ina waiwaiyega, manuna tauna sawesawenaya be yage maibo'adi 'ediya 'ietoloina.v6 Gu 8:3v7 Md 13:46v8-9 Lo 3:21-22v10 Lo 6:3-5v11 1 Ko 15:23v12 1 Ti 6:12,19v14 1 Ko 9:24v15 1 Ko 2:6v17 1 Te 1:7v19 Lo 16:18v20 Ep 2:6,19v21 1 Ko 15:28